ဖော်ပြချက်
တစ်ခါတလေကျရင် တခြားလူတွေရဲ့ မျက်နှာအမူအရာလေးတစ်ခု၊ စကားတစ်ခွန်း ဒါမှမဟုတ် ကိုယ့်အနားမှာ စိတ်ဆိုးနေတဲ့သူတစ်ယောက်ရှိရုံနဲ့တင် ကိုယ့်စိတ်ထဲမှာ နေမထိထိုင်မသာဖြစ်ပြီး တွေးတောပူပန်နေမိဖူးလား…
သူတစ်ပါးကို အမြဲဦးစားပေး၊ အားနာတတ်ပြီး တခြားသူတွေအဆင်ပြေဖို့ ကိုယ့်စိတ်ကို အမြဲဖိနှိပ်ထားရတာ ကြာလာတော့ စိတ်ပိုင်းဆိုင်ရာရော ရုပ်ပိုင်းဆိုင်ရာပါ လူက မောဟိုက်နွမ်းနယ်လာရပါတယ်။ 'ငါ မကူညီပေးနိုင်ရင် အပြစ်ရှိသလိုပဲ' ဆိုတဲ့ ခံစားချက်ကြီးနဲ့ စိတ်ပင်ပန်းနေရတဲ့ ကိုယ်ဟာ အထိမခံလွန်းတဲ့သူတစ်ယောက် မဟုတ်ပါဘူး။ နက်နက်ရှိုင်းရှိုင်း ခံစားတတ်တဲ့သူ (Highly Sensitive Person) တစ်ယောက် ဖြစ်နေလို့ပါ။
ဒါပေမဲ့ ဒီလိုအရာရာကို ခံစားလွယ်လွန်းနေတာက သင့်ဘဝကို အဆိပ်အတောက်ဖြစ်စေပြီး ကိုယ့်ကိုယ်ကိုယ် ဖြည်းဖြည်းချင်း ဖျက်ဆီးနေသလို ဖြစ်နေပြီဆိုရင်တော့... ခုပဲ ရပ်တန့်လိုက်ဖို့ လိုအပ်နေပါပြီ။ ကမ္ဘာကျော်စာရေးဆရာ Daniel Chidiac စာအုပ်ကို ဘာသာပြန်အနေနဲ့ ပြန်လည်ရေးသားထားတဲ့ "ဖြစ်ချင်တာဖြစ် စိတ်မညစ်နဲ့" (Stop Letting Every Thing Affect You) ဆိုတဲ့ စာအုပ်လေးက သင့်ကို အဲဒီစိတ်အမှိုက်တွေ၊ အတွေးလွန်တာတွေနဲ့ ကိုယ့်ကိုယ်ကိုယ် ထိခိုက်စေတဲ့အရာတွေထဲကနေ ရုန်းထွက်နိုင်ဖို့ လက်တွေ့ကျကျ လမ်းပြပေးမှာပါ။
သူတစ်ပါးရဲ့ စိတ်ခံစားချက်တွေကို လိုက်ထမ်းထားရတာ ပင်ပန်းလှပြီဆိုရင်တော့... ကိုယ့်စိတ်ကို အေးချမ်းမှုပေးဖို့၊ ကိုယ့်ကိုယ်ကိုယ် ပြန်ချစ်တတ်ဖို့အတွက် ဒီစာအုပ်လေးကို မဖြစ်မနေ ဖတ်ကြည့်ဖို့ တိုက်တွန်းပါရစေ။